係人都知，飲食業係呢類個案嘅重災區。好似歐陽先生咁，做咗呢行廿年有多，○八年初發現僱主冇按時為強積金供款，多次追討冇下文，幾個月之後間酒樓仲執埋添。更離譜嘅係，舊老細居然喺其他區另開酒樓，擺明玩移形換影走法律罅。

歐陽先生唔忿畀人搵笨，向積金局舉報，點知對方竟拒絕協助，原因係嗰個老細利用唔同公司登記。結果，事主被拖欠嘅六千幾蚊強積金依家都未到手，只能望天打卦。

唔係啩？明明係無良僱主出蠱惑，積金局竟然冇佢符。六千幾蚊對衣食無憂嘅積金局官員嚟講濕濕碎，卻係好多搵朝唔得晏嘅普通打工仔嘅血汗錢，甚至可能係退休後唯一經濟來源，積金局闊佬懶理，冷漠啲啩。正如歐陽先生話齋，「個計劃明明係政府搞出嚟，依家又乜都追唔到，真係好唔負責任！」

講到底，打工仔被拖欠強積金供款追討無門，完全係當局監管不力所致。一直以來，僱主拖欠強積金供款情況嚴重，舊年十月嘅數據顯示，積金局過去一年檢控咗一百零五宗拖欠強積金供款個案，但總罰款額只有九十萬，佔應追討金額百分之二點一，有啲檢控個案罰款只得五十蚊咁大把，你話邊有阻嚇作用吖。

現行法例好明顯存在漏洞，積金局監管受託人公司權力不足，變咗無牙老虎，畀人有機可乘。當局唔從速修例，堵塞漏洞，違例判罰又輕，無良僱主有乜法子唔愈來愈肆無忌憚吖。

查實，除咗拖欠強積金供款之外，無良僱主仲有一個那渣招，就係長期拖欠薪金，然後突然結業走佬，打工仔一夜之間打爛飯碗不特止，連人工都追唔番。呢，舊年十月底，香港仔鴨脷洲一間中型酒樓突然執笠，六十幾個員工被拖欠嘅薪金、代通知金及遣散費合共約八十萬，強積金供款更被拖欠咗成年。

呢啲個案年年都有，至弊當局一直唔重視維護基層打工仔嘅權益，對呢頭結業、嗰頭換個招牌又開檔嘅行為打擊不力，搞到欠薪保障基金變咗無良僱主嘅提款機，納稅人做晒冤大頭。

嗱，年關就快到，農曆新年過後往往係中小型食肆執笠高峰期，加上金融海嘯仲未完全過去，本港經濟根本唔係港府高官吹嘅咁好景，市道未明，消費疲弱，業界難以生存，食肆倒閉潮隨時會出現。咪話功夫茶唔點醒港府呀，如果仲係懶懶閒，繼續做無牙老虎，呢班有汗出冇糧出嘅打工仔隨時操上禮賓府搵煲呔曾「拜年」㗎！