政府硬推豬流感疫苗計劃，可惜反應冷淡，一大班高官好似食衞局局長周一鑊同教育局局長孫明揚，上個月喺煲呔曾帶領下齊齊做咗一場「打針騷」，呢支流感針，作為醫管局主席嘅胡定旭當然唔打唔得。尋日肥胡出席大埔一個健康安全運動日，打鑼打鼓主禮過後隨即走人，問佢打咗針未，佢展現例牌笑容話：「打咗。」咁打完之後有冇咩唔舒服呀？佢即刻話：「一啲都冇……非常正常！非常正常！我打咗喇！」
咁會唔會帶埋屋企人一齊去打針呢？問到屋企人嘅問題，肥胡一樣答得快：「佢哋自己決定啦！」之後因為趕住去坐飛機，一個箭步上車離開。唔知肥胡屋企人會唔會驚咗副作用唔去打針呢？不過見肥胡尋日健步如飛，點睇都唔似腳軟無力抖唔到氣，打針嘅不良反應一定冇響佢身上出現，可惜一宗懷疑打流感針引致吉巴氏綜合症嘅Case，高官也好、醫護人員也好，四萬咁口落足力話打針幾安全，都係枉費心機！