立法會議員葉劉淑儀同運輸及房屋局局長鄭汝樺（Eva）兩個都鍾意着Armani，早前仲喺立法會會議上發生過撞衫事件。葉太尋日出席財委會高鐵會議時，特別揀咗件佢知道Eva冇買到嘅黑色Armani外套着，咁就肯定唔會撞衫喇！葉太尋日仲襯埋嗰條黑色緊身皮褲，呢條褲背後原來有一段古。
話說葉太當年做緊保安局局長推銷廿三條期間，曾經着住呢條皮褲、襯埋黑色上衣同墨鏡出席一項公開活動，後來畀人揶揄佢係「女黑俠」。佢又憶述當年立法會廿三條草案委員會亦曾經喺周六、日開馬拉松式會議，前後傾咗近百粒鐘，所以對Eva今次嘅苦況，絕對係感同身受。
葉太大讚政務官出身嘅Eva，喺整個高鐵爭議中面對泛民圍攻都冇畀佢哋捉到任何「金句」，明顯係吸取咗佢當年教訓，變相為自己當年經常抵唔住頸發老脾同講錯嘢認衰。