潮流興學外語，但學潮州話就相對比較冷門。尋日浸大持續教育學院搞咗個「潮汕語言文化探索」講座，仲請埋同係潮州人嘅前天文台台長「黑英」林超英同骨科名醫高永文嚟，介紹潮州嘅歷史同飲食文化，等大家齊齊「潮」學潮州文化。
一向以身為潮州人自豪嘅黑英話，潮州一帶畀群山包圍，河都唔多條，地理位置喺中國嚟講算係非常差，但就因為地理位置嘅限制，造就咗潮州人捱得同刻苦嘅特性，但黑英就笑言自己唔係真係咁捱得喎。
講開最難以忘懷嘅潮州美食，黑英就話一定係佢太太煎嘅蠔烙。黑英話佢太太煮嘢食好叻，煮嘅蠔烙同街上食到嘅完全冇得比，可惜最近一直修讀緊中醫課程嘅太太要返內地實習，搞到黑英依家一日三餐都要一支公搞掂住先，暫時與蠔烙無緣嘞。
一向嘴刁嘅高永文都對潮州菜情有獨鍾，佢最鍾意嘅莫過於佢媽媽煮嘅「鹹魚豬肉餅」，可惜佢媽媽過身後冇機會再食。高醫生話為咗追憶媽媽，佢曾經遍尋港九新界搵嗰種特別嘅鹹魚，再將呢味餸嘅烹調方法傳授畀一間相熟嘅茶樓，等佢幾時想食都可以食到，亦可以將呢味咁正嘅佳餚傳揚開去。