本文重點
有人話成功男人背後有個女人，但教育局局長孫明揚背後仲多個滿臉鬍鬚嘅新聞秘書李崇明（Timothy），尋日退休同孫公正式告別。Timothy喺政府新聞處工作逾三十年，與孫公由區域市政局年代開始合作，追隨孫公十幾廿年，兩人猶如老拍檔，孫公前晚就喺中環德己立街港大同學會會所擺兩圍餞別Timothy，場面感人。
孫太送相機作禮物
卓妮見參加餞別宴嘅都係教育局內相熟同事，除咗孫公同太太鍾小芬外，之前代表孫公到英國出席教育部長會議嘅副局長陳維安，都搭早一班飛機趕回港送別Timothy，當然仲有政治助理楊哲安啦！臨別依依，孫公與Timothy互笠高帽，分別讚對方係好老闆同好幫得手嘅下屬，孫太仲送咗部數碼相機畀Timothy作為告別禮物。
孫太搞笑形容，孫公好似《西遊記》嘅唐三藏，身邊有好多能文能武嘅得力助手，Timothy係其中一個喎。計卓妮話，孫太最感謝嘅應該係Timothy多年來為孫公擋駕，事關可以讓孫公早啲收工返屋企嘛！
卓妮