17/01/2010

中環出更:官紳名人齊向發叔賀壽

踏入二○一○年,政界第一宗喜事就鄉議局主席劉皇發擺大壽,前晚在尖沙咀半島酒店嘉麟樓大宴親朋,官商及鄉紳名人好友齊到賀。卓妮都有去湊熱鬧,見到發展局局長林鄭月娥、民政事務總署署長陳甘美華、前民政事務局常秘「媽打」李麗娟及恒基地產副主席李家誠等名人,各界咁畀面,發叔就向每人派發足金壽桃作為回禮。

原本今個月廿二日先至係發叔正日生日,但發叔諗住正日清心寡欲去志蓮淨苑食齋,所以家人提早一個星期為佢慶祝,但遇啱立法會審議廣深港高鐵撥款,發叔玩得心掛掛。當晚所有仔女及孫仔孫女三代同堂齊向發叔祝壽,發嬸更加悉心打扮,穿着中式長衫顯得高雅脫俗。卓妮問發嬸預備乜嘢生日禮物,發嬸就話客家人唔興送禮物,只祝願發叔快樂又健康!

發叔送地皮冧老婆

不過,發嬸個契女就玩踢爆,話發叔掉轉頭送禮物畀發嬸,呢份禮物唔講得笑,係九龍塘一幅幾萬呎嘅地皮。發嬸急忙澄清話:「仲睇緊未買㗎,睇啱可能用嚟起樓,可能老公想我做地產經紀啩!」發嬸講嗰陣甜絲絲,冧到痹,睇怕笪地應該袋袋平安嘞。好多老婆鍾意老公多啲陪自己,但發嬸反而希望發叔繼續服務市民,等佢多啲自由時間喎。

其實發叔愈做愈精靈,尋日傍晚高鐵撥款啱啱通過之後,大班議員被困喺立法會大樓入面,發叔同經濟動力成員企埋一齊,笑謔自己今年只係得三十二歲,梁劉柔芬更加話發叔呢個「哥哥」只得二十八歲,氹得發叔不知幾咁開心!

卓妮