話說劉太七年前來港同丈夫團聚，隨即入紙申請公屋，上月底終於獲派九龍灣啟業邨一個單位，點知天意弄人，丈夫臨上樓前不幸因食道癌復發不治，房屋署隨即反口，話劉太仲差幾日至居港滿七年，拒絕原先已批出嘅公屋申請，要佢重新輪候。

喪夫已經夠慘啦，仲要失驚無神畀房署收番個公屋單位，正一人屋兩空，直頭慘過畀人喺傷口灑鹽。冇錯，公屋編配有一定嘅準則及程序，但規矩係死嘅，人係生嘅，特殊情況可以特殊處理，更何況政府部門有酌情權，房署完全唔考慮人哋嘅苦況及處境，仲有冇涼薄啲呀？

懶理市民疾苦嘅，仲有社會福利署。劉太為幫丈夫醫病，已經耗盡積蓄，依家唔止上樓夢碎，連丈夫嘅殮葬費都成問題，迫不得已之下，惟有向社署申請緊急殮葬基金，點知社署見死不救，除咗搵各種各樣理由拒絕，甚至叫佢「借大耳窿」辦喪事，簡直豈有此理！

劉太夫婦一個做大廈保安，一個打地盤工，自食其力，冇攞綜援，加上丈夫病咗幾年，經濟狀況係點，諗都諗到啦。迫於無奈搵社署幫吓手，對方諸多推搪不特止，仲講埋啲咁難聽嘅話，唔止涼薄，直頭係冷血！

話時話，社會上好多慈善基金都可以為劉太呢類有需要人士提供緊急援助，其中有啲基金只需在港居住唔少於一個月，就可以申請殮葬津貼，而且冇資產審查限制添。社署人員冇協助劉太尋求呢啲基金援助，反而叫人去借貴利，簡直混帳！

港府坐擁龐大資源，為公務員加人工就出手闊綽，但係對基層市民就算死草，慳得就慳，避得就避，甚至理都懶理。早排寒流襲港，有個住柴灣舊式公屋單位嘅九十歲婆婆唔夠被禦寒，致電社署求助，但兩日都冇回覆，最後要經本報代為投訴，社署至派兩張毛氈畀婆婆。

其實，如果房署同社署真係為納稅人荷包着想，對申請個案嚴格把關，都情有可原。至弊呢班官僚根本就係懶得就懶、拖得就拖，冷血、涼薄，對窮人嘅困苦無動於衷、不聞不問。例如，房署同社署曾多次被踢爆對濫用公屋資源嘅行為冇監冇管，審批綜援申請個案亂晒大龍，但幾時見佢哋認真檢討，嚴格把關吖？

孟子話，惻隱之心，人皆有之；羞惡之心，人皆有之；是非之心，人皆有之。香港呢班官僚個個涼薄無情，歸根究柢，就係因為佢哋根本冇惻隱之心，冇羞惡之心，冇是非之心！