煲呔曾前日喺立法會一改口風，承認本港深層次矛盾不只經濟，還包括政治及社會矛盾，承諾政府會推出措施紓民解困。不過，煲呔曾口中嘅紓困措施，其實細到要搵放大鏡至睇得清楚，只不過係議員爭取多時嘅學童上網費資助及偏遠地區居民跨區交通津貼啫。
立法會政黨過去一直爭取將學童上網費用納入綜援計劃內，但當局一直拒絕，雙方講到口水乾都係講緊涉及每年一至二千萬元開支。至於跨區津貼涉及每年開支都係一至兩億元，與過去十五個月包括財政預算案及其後加碼措施八百五十億元相比，可謂九牛一毛。
煲呔曾同鬍鬚曾諗縮數不特止，更離譜嘅係勢兇夾狼強搶下屬成果留己邀功。學童上網費資助和跨區交通津貼兩項政策均由勞福局局長張建宗負責，有勞工界議員踢爆，上述兩項政策其實研究後已有定案，隨時會公布細節，可惜中途畀鬍鬚曾截住，有心留待下月預算案一併公布，點知依家又畀煲呔曾利用嚟補鑊，張建宗畀上頭咁玩法，認真可憐。