政府做嘢成日都漏招，早幾日先被本報踢爆平等機會委員會主席真空、會內無人駕駛，政制及內地事務局翌日要急急補鑊。尋日政府刊憲又被揭發再涉漏招，事關政府公布天文台台長李本瀅舊年十一月十一日開始真除台長，點解憲報拖到依家先登出嚟呢？
公務員事務局發言人解釋，李本瀅早喺舊年五月十一日已接上手林超英嘅空缺、署任天文台台長。半年之後，即係十一月十一日，就正式升任天文台台長喇，至於兩個月後先公布，係因為內部要處理刊憲程序喎！登個升職公告都要兩個月，政府嘅辦事效率真係驚人。
天文台台長係個重要職位，遇到打風時，具有法定權力嘅天文台台長要喺憲報出公告，話明幾時有個颱風影響香港，公告嘅內容影響千萬公司運作，如職員加班津貼點計、航空或保險等公司面臨嘅賠償糾紛及轇轕由幾時生效等。雖然政府話李本瀅舊年十一月已經做咗台長，但邊個知呢？唔刊憲就靜雞雞行使呢啲權力，咁唔透明嘅做法真係唔符合二十一世紀嘅要求啦。