學德蘭修女話齋唔係每一個人都能夠做大事，但係大家就可以做充滿愛嘅小事，呢句說話套用喺環保都好適用，事關環保意識係要從生活細節開始做起，所以家庭教育好重要，青聯主席陳仲尼（Rock）同佢太太區海倫就好落力從家庭開始推動環保。
唔知大家仲記唔記得，早排廣東省發生旱災，雖然話香港同內地簽咗約，有東江水源源不絕供應食水，但係如果真係無水，任你點有「水」都係解決唔到水塘乾塘問題，所以陳家即時啟動緊急機制，自行採取慳水措施，區海倫下令仔仔們要慳水，每次開水喉都唔可以開到個水龍頭咁大，沖涼亦唔可以浸浴，玩水就更加唔容許啦！
食水係地球嘅珍貴資源，因為全球暖化，搞到好多作為食水源頭嘅冰川都逐漸減少，加上降雨呢啲嘢係望天打卦，所以作為地球人，真係要好好珍惜資源，唔係第日要臨渴掘井就大件事啦！