早前有人呼籲支持高鐵嘅人喺尋日立法會財務委員會審議撥款時，要着紅色衫，點知只得謝偉俊（Paul）最聽話，佢着咗全身紅色嘅運動裝，徹底到連底衫都紅埋，以示撐高鐵嘅決心，喺全體議員裏面，望勻只得佢一個人係咁着，畀所有人放晒飛機，仲畀人笑佢似聖誕老人添。不過獨行慣嘅阿Paul唔理人點睇，仲話着咗三層衫又戴埋帽，夠晒保暖添。
自由黨同經濟動力都撐高鐵，但為撐高鐵搶客，都要爭一餐。自由黨幾十人一早就喺立法會停車場請願，要求財委會盡快通過撥款。黨主席劉健儀更準備咗「撐高鐵、反拉布」貼紙，派畀一眾支持高鐵嘅議員貼喺身上，兼且再送每位議員一封信，內容大意係唔認同拉布行動，希望財委會盡快通過撥款。
經濟動力都好有聲勢，佢哋朝早搞開篷花車巡遊到尖東星光大道，要求遊客簽名支持高鐵，下晝仲拉埋其他同僚黃宜弘、黃定光等上花車，不知幾高興。