本文重點
高鐵撥款終極大戰尋日喺立法會上演上半場，建制派同反高鐵陣營馬拉松式對決，其中又以工聯會最肉緊，除咗高鐵撥款影響數以十萬計建築工友生計，仲因為工聯一早定好今日喺東莞辦高爾夫球邀請賽，請到高官唐英年同陳家強主禮，四位議員林健鋒（Jeffrey）、梁君彥、劉皇發同黃宜弘參賽，但係依家全部要留守議事堂，令球賽聲勢降晒呢，工聯一桿入洞響頭炮美夢落空，多得泛民唔少。
反高鐵八十後同工聯會旗下一班建造業工友喺場外頂到行。撥款最後能否如期通過，今日揭盅，不過，工聯注定先輸一仗。工聯會一向形象基層，近年想衝破局限，標榜專業，而其轄下嘅金融專業委員會肩負呢個重責，所以由會長鄭耀棠擔任主任，又由○七年起搞深港金融業高球賽，就係想省靚招牌，點知好夢成空。
今日投票撞晒期
○七年深港金融業高球賽，以港區政協、人大為主，今年聲勢「升呢」，除咗上次都有捧場嘅財經事務及庫務局局長陳家強外，今次仲搵高官主持揭幕式，又有四位立法會議員參賽，係威係勢，可惜吖，高鐵撥款一拖再拖，竟然遲唔遲、早唔早，拖到喺今日投票表決，認真人算不如天算囉。
唐唐同陳家強已經通知棠哥，高鐵大戰在即，佢哋要留守香港，所以無法抽身北上嘞，而四位本來喺球賽中一展身手嘅議員，亦有興致勃勃一心打番幾個「小鳥」球，變成被迫放鴿子，全部甩晒棠哥底，其中損失最大嘅應該係有政壇「活士」稱號嘅Jeffrey，佢本來拍住梁君彥、發叔、黃宜弘組隊參賽，可大展身手，甚至攞埋獎返嚟，點知今日要被迫留喺議事堂坐定定陪人玩拉布，相當無癮。
不過，最無癮係工聯會，諗住搞場高球賽可以一桿入洞谷聲勢，點知到頭來被高鐵撥款一鋪翹起，一Ｑ清袋，今年力邀嘅高官同議員嘉賓，全部放飛機，球賽規模即刻大縮水。