本文重點
早前煲呔曾一心諗住入元朗品嘗名不虛傳嘅「奶茶王」大發奶茶，點知覓食大計不幸畀傳媒撞破，搞到佢過門不入，奶茶去到嘴唇邊都冇得飲，後來至鬼祟再去。事隔半個月，煲呔曾再次落區覓食，點知仍然畀卓妮撞破。
瑟縮角落歎煲仔飯
呢個星期日嘅夜晚七點，卓妮見到煲呔曾一行六人現身西環桂香街嘅街坊菜館坤記醫肚。今次煲呔曾繼續龜縮，實行瑟縮喺近門口嘅角落位度歎煲仔飯，其他同場嘅食客想埋佢身都幾難。
上次煲呔曾出巡去元朗歎奶茶王，曾經大牌地安排過便衣警員鎮住門口，今次驟眼睇就冇便衣喺度，之但係坤記嘅老闆娘護住煲呔曾，喺門口維持秩序，仲唔畀人舉機影相。
坤記雖然面積細細，但喺區內人氣極高，其中以佢嘅煲仔飯最出名，飯焦焦而不燶，吸晒豉油同臘味嘅油分，係唔少西環街坊嘅「飛佛」。坤記晚晚爆滿，訂枱熱線長期打唔通，可見其受歡迎程度絕對唔嘢少。
卓妮