本文重點
中環ifc利苑酒家貴為米芝蓮星級「名人飯堂」，過橋鮑魚、生拆蟹皇翅和冰燒三層肉出晒名，吸引到不少名食客捧場。卓妮早排有晚就遇到前財爺梁錦松與太太「跳水王后」伏明霞同一對男女朋友去幫襯，四人喺商場沿途傾到雞啄唔斷，就算搭扶手電梯，阿松都擰轉身手口並用照傾可也，最後一齊步進酒家，由阿松點菜。
夜晚九點幾食飯似乎夜咗啲，但卓妮見阿松三個仔女唔在場，應該係趁仔女瞓咗覺，free time出去輕鬆吓，約吓朋友食飯敍舊。又好難怪嘅，自稱「二五仔」穿梭中港兩地嘅阿松經常不在港，放假有時間都陪咗仔女先啦！據講呢餐飯之後有一晚，阿松兩公婆就帶埋七歲嘅大女司渝去灣仔君悅酒店參加派對開心吓，但兩個細仔就無份囉。
受浸成基督徒
阿松同小伏近年篤信耶穌，去年卓妮就發現佢哋經常去金鐘「港福堂」參加活動，聽聞阿松兩公婆喺聖誕節前已受浸禮，成為真正基督徒。據講受洗要先喺教會修讀信仰班和受浸班，經教會牧師決定及批准後，先至可以受洗，過程一啲都唔簡單。
卓妮