漫畫講一班學生點樣搞好工程學會，寓意港府可以點去搞好香港。不過故事竟然暗喻煲呔曾嘅支持度創新低，仲大數煲呔曾專權霸道、抱殘守缺、勞民傷財等「七宗罪」。

不過千祈唔好以為市民會睇得好開心，因為個古仔仲暗指全港廣大市民係「刁民」，指市民根本無理解過政府嘅壓力同困難就亂咁批評，所以處理預算案時，唔會同「刁民一般見識」喎！

漫畫仲透露咗鬍鬚曾嘅一啲心聲，故事主角提到派錢減低民怨係「太短視」，指要多做工程基建，就算有赤字嘅預算都不以為然。相信去到最後預算案出台，市民望穿秋水嘅紓困措施都係得個吉。

另外，主角仲穿越時空去咗三國蜀國向諸葛亮取經，大家都知諸葛亮出師未捷身先死，而蜀國最終係畀人亡國，鬍鬚曾呢本漫畫對象唔明確之餘，仲好大吉利是添。