好多人喜歡每朝歎杯咖啡「開腦」，財經事務及庫務局副局長梁鳳儀都唔例外，每朝返辦公室前，都會飲杯香濃咖啡醒一醒神，即使遇到突發事件，反應都快啲。好多人為求方便會幫襯連鎖咖啡店，但三幾十元一杯唔多划算，梁鳳儀年前送仔女到英國讀書時，順便喺歐洲買咗部千五蚊嘅特價咖啡機返香港，再買Nespresso嘅coffee capsule（咖啡膠囊）返屋企沖，自製只係幾蚊一杯平靚正嘅咖啡。
呢部Nespresso專用嘅咖啡機一啲都唔輸蝕，事關咖啡機可使用新式capsule，並以定溫高壓系統沖製咖啡。咖啡粉密封喺鋁質膠囊內可杜絕氧化和酸化，每顆capsule能保持咖啡粉烘焙研磨後四小時內嘅新鮮度，保鮮期更長達九個月，而來自各地嘅咖啡種類共有十六種，每個capsule只係由四元七角至五元三角啫。中環ifc國金商場有間專門店，咖啡機同capsule都有得賣，梁鳳儀都係常客。
梁鳳儀話，自己飲咖啡未去到上癮程度，但每朝點都會沖杯嚟飲，最喜愛濃縮咖啡加奶，仲話幾蚊一杯靚咖啡好抵飲，認真知慳識儉！
卓妮