喺前日嘅立法會財委會特別會議上，「金勞詹」詹培忠同社民連黃毓民爆粗互罵，一個鬧對方有黑底，一個鬧對方係監躉，事後兩人仲要握手言和兼道歉，但可以肯定有人餘怒未消。好似尋日立法會內委會討論係咪成立委員會調查基督教女青年會前社工「受壓」事件，即「河蟹事件」，一直反對查甘威嘅議員謝偉俊舊事重提，話甘威事件根本冇原告，本來就唔應該查；依家河蟹事件既冇原告，又冇被告，都唔知為乜要查，更加唔應該查！
阿Paul愈講愈火：「如果單憑一句半句就話要查嘅話，咁不如查埋立法會議員有冇黑社會身份呀！大家咁鍾意查，不如個個去做法官，唔好立法。」金勞詹同阿Paul係師徒關係，前日立法會發生爆粗事件，依家阿Paul又提「黑社會」，唔知係咪想為師傅出頭？
講開又講，尋日立法會開馬拉松會議討論高鐵撥款，IQ博士黃宜弘竟然上網睇靚女，佢唔係
女議員，而係睇收藏喺佢枱頭電腦內嘅美女相，相中人係五年前海南島選美比賽嘅得主，隔籬仲有黃太梁鳳儀。IQ博士話，睇相並非開小差，而係部電腦內有千多張相，一開機啲相就會Load出嚟。咁有冇情慾照呢？IQ博士笑騎騎話：「有就發達囉！」身為公眾人物，佢話唔敢行差踏錯。
