「80後」最近成為熱門話題，元旦夜中聯辦被衝擊後，政壇中人明白乜嘢叫後生可畏，相比之下，議會新人陳淑莊同陳克勤即刻變晒陳年老薑。不過，對呢股「80後」現象，各人見解不同，當中有讚亦有彈。

代表工業總會嘅Andrew，從經濟效益角度為「80後」諗後路，話呢班後生仔有毅力、有拚勁，可惜有啲捉錯用神，將毅力同拚勁放喺唔應該投放嘅地方；如果投放喺事業，肯定所向披靡，做乜都咁掂，對社會好，對自我前途亦好。

Andrew兒子梁宏正（Clarence）係「70後」，擁有英國劍橋大學經濟學碩士銜頭，學成回港後從事資訊科技行業，累積相當經驗之後，依家幫Andrew打理家族生意。Andrew話，好多「80後」同「70後」後生仔都肯腳踏實地，寄語尋日立法會外嘅「80後」重新定位，放開懷抱、開放視野咁話。

KK年輕時曾參加「暴動」

同樣係「50後」嘅工聯會黃國健（KK），亦有一個「80後」兒子，去年喺澳洲大學畢業，依家搵緊工。KK話，佢個仔一樣對社會不滿，成日怨澳洲政府政策不公平，年輕人發展苦無出路，佢勸兒子凡事向積極方面諗。KK自言，自己都年輕過，激情過，讀初中時已經有份參加當年被形容為暴動嘅天星小輪加價示威，爭啲做咗當時絕食抗議嘅蘇守忠第二，不過，成長之後，先至發現社會有問題，唔係激情就可以解決。KK呢句話，似講畀反高鐵嘅「80後」聽多啲喎。

香港「80後」以激進樹立鮮明形象，謝偉俊（Paul）尋日喺立法會民政事務委員會上，講起參加東亞運嘅青年義工，突然有感而發，話年輕人應該將時間、精力放喺有益事情，好似做義工咁，唔應該放喺以為對社會好、其實根本無嘅事情上。阿Paul呢位「50後」似乎對「80後」好有意見喎。

由天星碼頭、皇后碼頭遷拆，到最近嘅劉曉波事件、元旦遊行、反高鐵，行動一浪接一浪，幾位「50後」議員嘅肺腑之言，相信亦係整個建制派對「80後」嘅評價主調。