本文重點
虐老事件揭露耆英悲歌，為咗令長者晚年活得更豐盛，養和醫院院長李維達醫生尋日以家族名義捐出一百五十萬元，成立「香港中國婦女會李樹培夫人啟知中心」，等長者有個中心讀吓書。
捐百五萬成立老人中心
李醫生行善不忘諷刺時弊，批評政府一味叫人起新醫院，卻懶得培訓醫護人員，搞到養和每年要自掏腰包數千萬元培訓人才，有苦自己知喎。
李維達尋日拖埋兄長李維文、姐姐李宛群出動，為中心開幕主禮，卓妮都貢咗去。李家同香港中國婦女會淵源深，李媽媽曹秀群係該會創辦人，生前樂善好施，公子李維達一於發揚光大，成立全港首間專為五十歲或以上長者而設嘅自助學習中心，開班教「老友記」學電腦、訓練記憶力等。
李醫生頭髮有啲花白，但仲未屆耆英之列，講起近日唔少財團爭相買地起醫院，佢話「唔起住」，事關現階段推出嘅地段唔多啱佢。咁養和會否加快擴充呢？李醫生就話「睇清楚先」，皆因起醫院易過借火，請醫護人手反而難過登天。
佢一講火都嚟埋，話多次向食物及衞生局局長周一嶽要求增撥資源培訓醫護人員，點知政府一味話無錢。李醫生同卓妮狂呻：「想問佢（政府）攞間課室、宿舍都話無。」用佢嘅話說：「政府完全無理過我哋。」
開幕禮上，香港中國婦女會主席胡郭秀萍都有現身，仲跟長者學串珠仔天鵝。胡太二月將以紅十字會總監身份去四川地震災區大派毛氈，之後同家人暢遊日本滑雪度新歲。
卓妮