本文重點
前年副局長委任公布之後，佢哋嘅人工同背景被大眾質疑，政府裏面兵荒馬亂，冇乜人有興趣知道副局長加入政府嘅經過。原來教育局副局長陳維安（Kenneth）係喺正式委任前夕先與局長孫公孫明揚見面，呢對教育局孖寶可謂喺盲婚啞嫁底下撮合！
毛遂自薦做副局
Kenneth同我哋講，佢一讀完書就喺投資銀行度做，後來跳槽去咗馬會，又加入埋港府嘅中央政策組做非全職顧問，對公共事務嘅興趣加深咗。政府公布政治委任制，佢仲向政制及內地事務局局長林瑞麟同當時嘅特首辦主任陳德霖自動請纓，話對副局個位有興趣。
Kenneth話自己曾經表示對商務及經濟發展、財經以及教育呢三方面有興趣，最後政府就派咗佢去教育局，仲喺正式宣布為副局長之前嗰幾日先被安排會見孫公。Kenneth講笑話，雖然知孫公係馬主，但咁多年都冇機會喺馬場認識佢，喺盲婚啞嫁底下，孫公想Say no都唔得啦。