珠姐話自己雖然少入廚，但都有幾味拿手嘅家常菜，而佢就最鍾意用李錦記嘅蠔油炮製菜心炒牛肉。佢話煮餸最緊要少油、少鹽同少糖，仲要即炒即食，咁就食得健康又好味啦。早前聖誕，佢同屋企人一齊去澳洲嘅黃金海岸玩咗四日，享受陽光與海灘。

孫啟昌助裝天眼無假放

不過，一樣係區議會主席嘅孫啟昌就得個恨字囉，事關佢冇得去旅行之餘，聖誕佳節都仲要開工。為乜搞到咁可憐？咪就係因為佢個環頭灣仔區都受到鏹水彈襲擊囉。身為灣仔區區議會主席嘅佢同我哋呻，為咗盡快安裝天眼，聖誕節期間差唔多日日都要去考察安裝天眼嘅位置，有時仲要一日跑兩場，同珠姐可謂同人唔同命。

尋日廠商會喺工展會搞咗個活動，請咗十八區區議會議員，黃友嘉（David）仲第一次以廠商會會長身份出席添。不過唔知係咪David初上場未係好習慣，例如招呼客人咁，不過經身邊嘅人提點，佢就立即醒水。