鬍鬚曾原本被視為下屆特首人選之一，今次率領一眾財金高官上京，拜訪內地多個負責財金同貿易嘅部門，包括國家發展和改革委員會、財政部及中國人民銀行等，一行人有成十一、二人，夠晒架勢，可以講得上唔打得都睇得。誰不知畀華北地區一場暴風雪打亂陣腳，原定尋日搭下午三點鐘機去北京嘅鬍鬚曾，要延遲到今朝八點半先有望起飛。不過北京天氣今日仲差，能否成功起飛，真係天曉得。

實力運氣皆欠奉

其實鬍鬚曾嘅黑仔指數已經飆升到超出警戒水平，先係去年九月尾突然心臟病發，被迫缺席建國六十周年嘅慶祝活動，除咗錯失一次上京面試嘅機會外，仲令人質疑佢身體狀況未必適合出任特首。最新公布嘅政府財務狀況又顯示，本財政年度未計第四季收入，財政赤字已減至三百八十九億元，比起鬍鬚曾原先預計全年財赤為三百九十九億元少咗一大截，結果畀財經學者炮轟佢年年計錯數，影響政府施政策略。依家仲要加埋「天意弄人」，令佢有京上不得，在在證明鬍鬚曾實力同運氣都欠奉。

鬍鬚曾今早會嘗試登機，不過究竟係咪「希望在明天」呢？其實北京呢幾日嘅天氣十分惡劣，及至鬍鬚曾原定嘅回程當天，即一月五日，氣溫更會急降至零下十六度，可能係北京四十年來最凍嘅一日。

常言道：「天有不測之風雲。」今次鬍鬚曾畀個天玩起，唔知佢會唔會學廣告仰天長嘆一句：「唔通連個天都唔鍾意我？」