其他天災人禍，同樣慘不忍睹，落馬洲一宗車禍就攞咗六條人命，豬流感搞到成間酒店要隔離，香港貧富懸殊嚴重程度居然一躍成為世界冠軍，窮到褲穿窿嘅貧困人口超過百萬，奇就奇在曾蔭權嘅施政報告隻字不提扶貧政策。

悲情故事一個接一個上演，咁又點可以叫做悲喜交集呢？等功夫茶話畀大家聽一個非常可喜嘅好消息，無論喺乜嘢困難重重嘅逆境之下，香港嘅善長仁翁依然係樂於助人。你以為金融海嘯害到個個身家縮水，所以捐錢救人都要勒住勒住咩，咁你就大跌眼鏡喇，東方日報慈善基金喺○九年收到善款一千五百萬，反而比○八年更多，而且係○六年以來最高嘅數字。經濟雖然不景，善款不減反增，你話香港人係幾咁可愛！

不經不覺，東方日報慈善基金成立已經二十五年，亦即係惠澤社群四分一世紀。單計過去一年，基金批出求助申請超過一千宗，受惠人次超過十二萬。

如果你想知道二十五年愛心送暖嘅受惠總人次，請恕功夫茶有可能嚇你一跳，因為具體數字係超過一百一十萬。

既然講開落馬洲車禍，不如同大家分享東方日報慈善基金係點樣救急扶危嘅。事發喺舊年一月二十三日，六個家庭頓失經濟支柱，知道呢單人間慘劇之後，基金第一時間成立「落馬洲車禍專戶」。一呼百應之下，迅即籌到三十萬應急錢，另外有兩位善長仁翁各自捐出十二萬，令到款項增至五十四萬。就喺事發當日，每個家庭獲發兩萬元以解燃眉之急。隨後捐款陸續有來，至今累積善款二百萬，已悉數交畀六個受害家庭。

如果你問功夫茶，四分之一世紀以來，邊單個案得到最多捐款？功夫茶會以香港人為榮咁講，一九九一年六月，兩母子梁朝英同姜善恒好不幸喺內地遇上車禍，嚴重燒傷要接受治療，熱情澎湃嘅香港人喺短短三個星期已經捐出一千三百萬，截至九一年底，善款累積更加高達一千四百萬！

講番舊年，受助個案除咗落馬洲車禍死者家屬之外，其實仲有好多。例如鼻咽癌復發嘅謝麗濃女士，透過基金嘅「醫療專戶」撥款接受連串治療，最終證實康復，唔止自己開心，亦為無數病患者帶來希望。

另外又有九歲嘅李嘉慶小朋友，患有複雜性先天性心臟病，由於佢喺內地出世，醫管局要收四十萬手術費。無計可施之下，慶仔家人向東方日報慈善基金求助，終於喺善長仁翁鼎力支持之下，接獲四十二萬，得到重生機會。順利接受手術嘅慶仔家陣已經拆除「心臟炸彈」，可望今年重返校園。

取諸社會，用諸社會，基於呢個持之以恒嘅服務宗旨，功夫茶謹代表東方日報慈善基金向各位讀者呼籲，請繼續濟弱扶貧，請維持捐款救人。香港很美，全賴有你！