聖誕新年假期完結，一班立法會議員又準備返嚟開工，其中「金勞詹」詹培忠就啱啱喺拉斯維加斯連賭十五日後返香港，不過今次佢無乜斬獲，話唔贏又唔輸得多喎，唔知係咪新年伊始就出師不利，之前信誓旦旦話一定會第六個辭職嘅金勞詹都開始想縮沙，佢最新嘅說法係好多業界唔想佢退出立法會，又話政治多變好多嘢話唔埋，簡單一句，即係佢好有可能打退堂鼓，唔辭職了！
金勞詹又話，其實依家唔少人對政府需要花費一億五千萬進行補選好有保留，佢個人都覺得唔值得花呢筆錢，仲估分分鐘立法會可能唔通過補選撥款添。所以就算辭職，都起碼要等到立法會通過咗撥款先算喎，如果唔係一旦補選唔成事，辭嚟都無用！
相對於金勞詹嘅急轉彎，「白姐姐」白韻琴就愈戰愈勇。前日佢出席一個元旦活動時話，今年新年願望係要「處置黃毓民」，而一直伴隨白姐姐左右嘅立法會議員謝偉俊就話會全力協助白姐姐達成呢個願望，白姐姐追擊黃毓民已經如箭在弦，睇嚟九西補選又會上演連場好戲！