一般人拜月老都係求姻緣，保險界立法會議員陳健波就啱啱相反，希望月老唔好畀囝囝咁快拍拖住。話說波哥早個禮拜帶埋太太同一對囝囝去咗台北玩，造訪一共供奉咗一百六十六尊神明嘅龍山寺，佢十九歲大嘅大仔一入到廟就飛奔咗去拜月下老人，祈求喺二十歲前開齋拍拖。
不過波哥覺得廿歲仔拍拖實在太早喇，之後偷偷地再向月老許願，祈求阿仔到三十歲先至識到女仔，希望月老最終可以中間落墨，最快廿五歲先畀阿仔拍拖，果然二代之間係有代溝嘅。
波哥又表示，以前佢入廟拜神一般都係祈求身體健康、世界和平等大路嘢，但經過一年多嘅議會生涯同折騰後，今次佢就改為祈求香港社會少啲爭拗、立法會工作順順利利。佢預期五名泛民主派議員正式辭職後，立法會運作會有效率得多，起碼唔使成日因為有人掟蕉爆粗而搞到流會，希望政府同餘下嗰五十幾位議員，會好好把握呢五個零月嘅清靜日子，為市民做多啲實事，真係語重心長。