健康快車前晚喺灣仔君悅酒店筵開四十幾席，舉行一年一度嘅「富貴吉祥紅盆宴」，升咗呢做名譽主席嘅陳振彬（Bunny）帶埋太太同兩個可愛囝囝一齊嚟支持，創會主席方黃吉雯舊年以一身金裝現身，今年就改着紅色示人，同樣咁高貴。
啱啱一家人喺北海道滑完雪返嚟嘅Bunny，相當容光煥發，完全睇唔出佢有腰傷，Bunny話出發前唔知係咪做運動之前未做好熱身，所以扭傷咗條腰，不過都無阻佢同囝囝一齊上雪山，仲可以同六歲嘅大仔一齊父子兵由山頂滑落嚟添。
講番個盆菜宴，今年都係由楊貫一主理，入面有齊各樣盆菜靚餸，鮑魚則分開上，一共籌得九十幾萬。一哥同小吉、Bunny，仲有「郭太后」謝雪心喺台上面主禮，實行同台下面嘅嘉賓齊齊「開紅盤」，寓意健康快車籌多啲錢之外，當然亦希望大家新一年都開紅盤搵多啲錢兼身體健康啦。