本文重點
上京述職時被中央領導人公開訓示要更好地解決香港深層次矛盾嘅煲呔曾，返港後未見痛定思痛，尋日又勞師動眾鬼祟出遊，中午突然通知憑一杯港式絲襪奶茶勇奪首屆茶王寶座嘅元朗洪水橋大發餐廳，一句話「會嚟食嘢」，搞到餐廳老闆彭氏夫婦悉心張羅。不過，煲呔曾之後又出爾反爾話唔嚟，實行大玩放飛機，唔止浪費賴旺明師傅嘅奶茶，更加錯過聆聽餐廳上下為佢準備嘅基層心聲，以煲呔自以為是、高高在上嘅精英心態，睇嚟佢要解決香港深層次矛盾，都係得個講字。
大發餐廳老闆娘彭太表示，尋日十二點幾收到電話，對方無講低係特首辦職員定警方，只係話煲呔曾會嚟食嘢，叫彭太盡量低調，仲要求預留兩張枱，指明一張係圓枱，一張坐卡位。彭氏夫婦見狀悉心張羅，而且花盡心思，除咗預備定得獎「金茶王」香滑奶茶同招牌豬扒包外，仲諗住整碟「苦盡甘來」嘅苦瓜炒飯畀煲呔曾歎，寓意煲呔曾要體恤民間疾苦，同市民分甘同味，令基層可以分享到經濟成果。
怕見記者 臨時縮沙
可惜，彭氏夫婦嘅成擔心機，最後被煲呔糟蹋晒。一個小時後，彭太突然收到電話，話煲呔曾取消訂枱。據目擊者稱，曾經見到煲呔曾坐住一架香檳色七人車喺附近路過，仲有交通警開路，同埋ＡＭ車牌嘅政府車，而之前更加一直有便裝警察守喺餐廳門口，可見煲呔曾可能知有記者在場，所以先至臨時縮沙唔敢露面。
彭太話，對煲呔曾臨時甩底有小小失望，期望佢會下次再嚟。大發太子爺彭敬威則語帶惋惜話，本來諗住當面要求煲呔曾關注基層就業問題，以大發餐廳為例，四十幾名員工絕大多數都嚟自天水圍，煲呔曾真係應該入嚟幫襯，為大家打打氣，了解吓大家嘅生活苦況。
「隱世茶王」賴師傅亦話，煲呔曾想飲奶茶，梗係要嚟茶餐廳飲啦，起碼貼近普羅大眾，希望煲呔曾多啲落區，了解基層需要，總好過終日坐喺寫字樓高高在上，淨係識去酒店歎咖啡吖。佢又希望煲呔曾認真諗諗點樣推廣香港茶餐廳文化，幫幫手推動經濟。
放人飛機嘅煲呔曾錯過品嘗得獎奶茶唔緊要，最重要係收到基層嘅肺腑之言，明白升斗小市民嘅心聲，咁港人就有福囉，之不過，以煲呔曾一向剛愎自用嘅性格，睇嚟大家都係要自求多福。