本文重點
卓妮之前講過身兼教授嘅中策集團主席馬時亨，日前與家人去咗北京探望修讀清華大學中文課程嘅細女露玲，尋晚又同太太王培琪、大女露明及由北京回港嘅露玲去紅館睇演唱會，一家共享天倫，正一廿四孝爸爸。講番露玲為何會去北京學普通話？肥亨話，露玲過去一直在外國讀書，滿口英語搞到成個鬼妹仔咁，學吓中文同普通話都係好嘅。
上電視學中文讚好
露玲咁生性可能亦係受好學不倦嘅肥亨影響，肥亨最近參與一個主題以中文正音正字嘅電視節目，學識好多從未見過兼且難讀、難明嘅中文字，他仲好硬銷咁大讚節目好正氣同有益添。展望今年工作，肥亨話會繼續以兼職方式做吓電台節目及到大學教書，最重要係做得逍遙自在，唔會為自己增加任何壓力喎！
卓妮