本文重點
自由黨「莎姐」周梁淑怡嘅大女智美去年十一月增添一名男丁後，已經有一仔一女湊成個「好」字，再加上細女智琪又生咗個囡囡，莎姐大部分時間都弄孫為樂，實行有孫萬事足，就連近期打得火熱嘅「五區總辭」補選問題都未有時間去諗，搞到做記者出身嘅智美都好奇當面問莎姐：「話時話，我都想知（你選唔選）喎！」
卓妮尋日路過中環歷山大廈，巧遇莎姐同智美在Cova餐廳食午飯撐枱腳，問吓莎姐會否重出江湖參加新界西補選，莎姐話未諗過呢個問題喎，就喺呢個時候，智美幫口向莎姐逼供，莎姐於是笑笑口話：「連個女都問我，證明我未傾過啦！老實講，我已經唔係政治圈嘅人，加上我咁忙，仲有三個孫仔孫女等住我玩！」
莎姐無做立法會議員後，大部分時間都弄孫為樂，閒時做節目主持過吓癮，生活優哉游哉，之前聖誕節仲去咗台灣旅行浸溫泉，寫意到極，又點捨得走番入個樊籠裏面吖！講開又講，智美去年尾添丁至今只有個多月，見佢好似修晒身咁，但莎姐就當面踢爆話：「塊臉修咗啲啫，但個身仲未得呀！」喺莎姐嘅督促下，智美修身工程真係指日可待。
大舊石醒覺要減肥
卓妮轉頭又喺太子大廈遇到立法會議員石禮謙拖住女友Lisa行街Shopping，見佢哋挽住一袋二袋，於是問吓買咗啲乜啦，大舊石話只係買咗小禮物送畀朋友喎！大舊石自從去年底第六度進行「通波仔」手術後，終於醒覺要開始減磅，之不過霎時間要放棄晒心愛嘅美食又好難嘅，難怪大舊石話：「慢慢嚟啦！」
卓妮