早前香港足球代表隊突破性喺東亞運動會奪金後，民政事務局局長曾德成既話要增加培訓本地足球，又話好有信心香港有條件申辦亞運會，直情好似飲醉咗咁。佢尋日撰文講番東亞運賽事，話南亞裔曲棍球員攞個銅牌向佢示威，忽然講到同班南亞裔球員不知幾熟落，睇嚟佢酒醉未醒喎。
南亞裔嘅港隊曲棍球員今次都喺東亞運奇迹地攞到一面銅牌，曾局長形容呢場比賽贏得咁漂亮，應該同香港隊喺足球決賽贏咗日本不相上下。其實南亞裔喺香港屬於少數族裔，佢哋以前嗌破喉嚨話喺香港受到歧視，政府漠視佢哋嘅需求，但民政局一直都搞唔掂。司局重組後，少數族裔人權嘅範疇由民政局過檔畀政制及內地事務局，於是開展有關種族歧視嘅法例，搞咗一大輪先搞得掂。
曲棍球賽事攞咗面銅牌，曾德成喺撰文攝咗一句話康文署都有功勞，又講到自己同南亞裔人士如何打成一片，睇嚟，佢如果唔係夾硬攞咗人哋塊銅牌喺自己面上貼金，就一定係醉到不省人事嘞！