銅鑼灣行人專用區尋日有個街頭論壇講普選，論壇期間一直落住微雨，不過出席嘅泛民成員一於少理，唯獨陳淑莊（Tanya）全程着住連帽風褸擋雨，但Tanya此舉並非錫身怕淋雨，而係因為貪靚。電過髮嘅女士都知道，電完髮之後最好兩日內唔洗頭，咁先可以令個髮型維持得靚啲、耐啲。原來Tanya出席論壇前去咗電髮，而個論壇一坐就成個幾鐘，佢為咗捍衞個新髮型唔畀雨淋濕，所以先會用風褸包到實。
Tanya過往一直以長直髮清純Look示人，何解突然一改造型呢﹖佢笑言，長直髮已經留咗好耐，就連佢個髮型師都嫌悶，叫佢轉換髮型。Tanya仲自嘲已三十有八，年屆中女之齡，所以要轉個成熟嘅造型嚟配合番佢個真實年齡喎。Tanya尋日亦趁機藉年齡硬銷普選，話自己由少女等到中女都未有普選，點知李卓人都唔執輸，戲稱Tanya只不過係「中女頭」，但佢已經等到「中男尾」，暗示自己喺民主路上，已經行咗好耐。