啱啱爆完護士集體請病假，搵病人較飛嘅瑪麗醫院又爆醜聞，呢次係醫院高層同醫生隔空罵戰，令人嘆為觀止。事緣該院微創手術中心原定明年開工，因為經費不足，院方惟有做「船頭尺」，搵各部門度水。有部門話院方諮詢欠缺透明度，佢哋毫無參與同發言權，依家仲要幫手籌款，擔心將來喺微創中心運作無「話事權」。醫療政策評議會發言人亦批評，醫管局撥款一直唔足夠，令醫院發展裹足不前。

瑪麗醫院行政總監回應話，微創中心耗資龐大，院方只能出兩千萬，僅夠畀部分裝修費，其餘嘅裝修、設施及儀器裝嵌費用，惟有搵各部門科水解決。佢仲承認，如果要求醫管局總部撥款，成個計劃唔知仲要拖幾耐。

拗到面紅耳赤，原來又係錢作怪。醫管局縮骨，公立醫院焗住自己諗計，矛盾因此而起。講真，前線資源不足唔係今日至出現，市民早就鬧到口臭，但一眾醫療衞生高官卻闊佬懶理，搞到醫院七國咁亂，到頭嚟又係病人受害。

嗱，瑪麗醫院早排改變手術安排，令護士每日超時工作四小時以上，唔少人捱到病，惟有「無聲抗議」。月初手術室有近半護士集體請病假，令三十宗非緊急手術要延期。期間一名女病人手術被押後七日，疑因手術由臨時頂更護士協助，多花一倍時間而出事，卒之不幸死亡。

查實，資源不足嘅受害人點止一個吖。有位病人血癌復發，雖然佢哥哥捐出脗合嘅骨髓，但因為瑪麗醫院病床不足，輪候成個月至可移植，可惜手術前發現體內癌細胞再度活躍，即使勉強移植亦難望成功，希望變咗失望。

講到尾，公立醫院問題多多，皆因醫管局本身管理混亂不堪。管理層架構臃腫、肥上瘦下，前線資源愈來愈緊張，醫護人員疲於奔命，醫療事故層出不窮，但醫管局高層一於少理，出咗事只識攞前線員工「祭旗」，從來唔去追究管理層嘅監管責任。你話醫護人員有乜法子唔士氣低落，有乜法子唔出現逃亡潮吖？

最離譜嘅係，周一嶽身為主管醫療衞生嘅問責局長，對公共醫療服務水準每況愈下視而不見，但推行搵市民笨嘅醫療融資計劃就鬼咁落力，仲話推動私營醫療服務唔會影響市民使用公營醫療服務嘅機會，簡直九唔搭八。試問公立醫院仲要亂到幾時，仲要爆出幾多醫療事故，死幾多無辜病人，你至肯落台謝罪吖？