呢廿幾罐特級大紅袍原來係楊孫西嘅私伙，特登由自己間武夷山茶廠運嚟香港，有錢都未必買得到，所以無人知定價，不過，要估亦唔難。楊孫西喺工展會有兩個茶葉檔，大紅袍貨源都係來自武夷山，我哋入去格過價，店內最貴嘅野生品種，二両裝盛惠四千八百蚊，人工培植而不含雜質品種，二両裝都賣成一千八百蚊。楊孫西送畀建制派議員嘅特級大紅袍肯定比店內貨色矜貴得多，但呢份熱情當然唔可以用錢去衡量啦。

呢間武夷山香江茶業其實係楊孫西幾年前嘅投資，本身係廠商會永遠名譽會長嘅楊孫西，日前拉大隊去工展會掃貨，刺激消費，吸引唔少傳媒採訪，但佢半步都無涉足自己嘅茶葉檔口博宣傳，以免畀人話有利益衝突，相當難得。