行政會議成員查史美倫(Laura)素來低調，尋日佢上電視接受前自由黨副主席周梁淑怡訪問時話，呢啲都係性格使然，事關佢鍾意多做少說。外界一直盛傳佢會做港交所主席，佢斷言否認，原來花名「查死你們」嘅Laura一心弄孫為樂。
Laura喺中港兩地證監會服務咗十幾年，佢憶述有一年返內地做證監會副主席，下屬對佢呢位空降新上司或多或少有點抗拒，仲喺佢上任三個月後幫佢改咗個花名「查死你們」，呢個正係「查史美倫」嘅普通話諧音，同Laura喺監管機構嘅工作不謀而合。
喺財經界打滾多年，Laura早已離開中國證監會，依家係港交所獨立非執董。每當港交所換主席嘅時候，總傳出佢嘅大名，對此Laura答得簡單而直接：「唔係呀，唔會啦！」佢話一來唔到佢話事，二來佢鍾意試新嘢，好似○七年大學教育資助委員會主席，都係一種新嘗試；最後佢想留番多啲時間畀家人，尤其係佢個孫。講起個孫，Laura笑得特別開心，話會同老公查懋成爭孫抱，認真係有孫萬事足！