早幾日廿三歲青年醉酒駕駛導致好教師身亡，為免聖誕假期再有不幸事件發生，警方連續幾晚喺港九新界進行大規模防醉駕行動。運輸及房屋局局長鄭汝樺（Eva）亦唔敢偷懶，前晚（廿五日）聖誕節佢有假唔敢放，夜晚九點鐘親自到中環皇后大道中視察警員隨機截查司機進行初步酒精測試，情況令人滿意，佢承諾半年內提交加強醉酒刑罰嘅修例草案。
據聞Eva視察警方執行防醉駕行動期間，與前線交通警員傾偈時獲悉，自二月九日新酒後駕駛條例生效後，年過三十歲嘅駕駛者安全意識提高咗，飲酒後一般都會搭的士，令夜更的士嘅生意好咗，但後生仔嘅危機意識就差啲，飲酒後揸車嘅比例較高，Eva覺得，長遠要加強教育年輕司機嘅安全意識，令年輕人知道生命可貴，就好似廣告所講：「生命無Take two」。
話時話，Eva放呢個聖誕假認真唔安樂，早前廣深港高鐵撥款因為議員玩拉布延誤撥款，跟住又發生醉駕奪走好教師嘅悲劇，除咗政府要加重刑罰打擊醉駕之外，真係要奉勸大家切勿酒後駕駛，唔好累己累人！