肥亨主持嘅電台節目，話咁快尋日播出最後一集。臨別秋波，肥亨搞搞新意思，宴請一班參與過節目嘅年輕人享受一頓豐富聖誕大餐，席間還自爆讀書時任性和反叛嘅行為。

肥亨憶述話，佢自幼好有玩嘅本錢，讀小學嘅時候鍾意騎膊馬同同學打交，又記得中學會考放榜嘅前一日，約埋成班同學去水塘燒嘢食玩通頂，翌日捱眼瞓返學校攞成績單。

支持年輕人有限度任性

肥亨話進入港大後都好反叛，試過抗議日本侵佔釣魚台；又有次參觀監獄後，寫意見書去報章爭取華人囚犯與外籍囚犯享有相同待遇；仲有一次聯同一班同學抗議巴士公司落實「不設找贖」計劃。肥亨覺得，年輕人之所以做出反叛行為，係源自後生心中嗰團火，即使大人難以接受，但年輕人點都會覺得理直氣壯，當然長大後回想自己嘅行為又係另一種睇法，只係觀點與角度嘅問題。

成長過程中深受英國樂隊Beatles（披頭四）音樂迷倒嘅肥亨，贊成年輕人可以有限度任性吓、去玩吓，盡量享受青葱歲月，留下美好回憶，但強調做任何事之前必須衡量是否正確，好似有調查話一成中學生贊成喺假期玩「一夜情」，肥亨話聽到都嚇一跳：「我個年代絕對無呢啲嘢，諗都唔敢諗，亦都唔敢講。」

佢又呼籲年輕人要珍惜生命，抱着拚搏和勤力嘅精神，注重良好人際關係，遇挫折時謹記「人生不如意事十常八九」，排除萬難向目標邁進，就必定會成功；用佢嘅話說：「香港經濟神話要靠年輕人去延續！」