27/12/2009

播放本新聞相關短片

中環出更:莊家蕙平安夜性感大變身

人哋話做賢妻要入得廚房、出得廳堂,原來做名人二代更加要識「變身」。莊士集團太子女莊家蕙上星期佢孖住哥哥莊家彬(Albert),參加菁英會喺深灣遊艇會舉行嘅聖誕聯歡晚會暨慶功宴,可能因為當晚有中聯辦及政府官員出席,卓妮見家蕙着住Miu Miu間條裙及外套,非常端莊,好有淑女feel,但到咗平安夜去Ball,家蕙就嚟個大解放,打扮性感去威番晚。

立法會議員霍震霆二公子霍啟山平安夜當晚,喺尖沙咀圓方W Hotel舉行私人聖誕派對,大約在晚上十時,名人二代魚貫抵埗,卓妮喺現場見到楊海成愛女楊嘉明、鄧永鏘一對寶貝仔女鄧愛嘉同弟弟鄧裕鏗、趙世曾兒子趙式浩、香港青聯主席陳仲尼及太太區海倫,仲有莊家蕙,而Albert、霍啟剛等就走秘道入去。

趙式浩否認同莊拍拖

卓妮見家蕙衣着索爆,身穿一件頭香檳金斜膊緊身裙,玲瓏浮凸嘅身材表露無遺,據聞條裙喺美國購買,家蕙相當鍾意。當晚家蕙乘坐趙式浩房車到場,但兩人落車後行到離行離列。卓妮問趙式浩係咪同家蕙拍拖,佢好大反應話:「梗係唔係啦!」跟住就急步走入會場。

家蕙自從同個名人二代分手後,未聞有新拖友。卓妮尋晚親自打畀Albert八吓家蕙係咪蜜運中,Albert就幫阿妹澄清:「佢哋只係好朋友啫,無聽過佢哋拍拖喎,仲係單身!」聽見Albert咁講,有意追求家蕙嘅公子哥兒個心係咪無咁實呢?Albert媽咪喺除夕夜生日,一家人提早尋晚去食飯慶祝,順便歡度聖誕節。

卓妮