本文重點
恒基千億新抱徐子淇（Cathy）生完次女晞兒之後，已經極速收身，卓妮見佢愈嚟愈弗，睇嚟都唔使戒口啦！果然，卓妮早前喺個酒會度見到Cathy，講起佢最愛嘅食肆蒲點，Cathy即刻精神百倍，狂讚國金商場本月初啱啱營業嘅法國餐廳The French Window。主廚Mickael Le Calvez仲爆料畀卓妮知，Cathy一個星期嚟三次添！
新世界集團第三代接班人鄭志剛一手湊大嘅尖沙咀新概念商場K11早前開幕，Cathy同老公李家誠（Martin）拖手仔去捧場，兩人形影不離，羨煞旁人！
為愛女戒牛肉
Cathy話，佢最近愛上The French Window，鍾意佢環境舒適自然，唔似一般法國餐廳咁拘謹，而且食物質素又有保證。佢最鍾意嘅前菜係「香煎玉米餅配鮮黑菌」，甜品係「焗杏仁香梨‧朱古力雪葩」。至於主菜呢，間餐廳最拿手嘅係牛肉，但Cathy唔食牛，所以廚師Mickael特別為佢炮製一道法國小鎮Mieral特色烹調嘅雞肉，再佐以黑松露菌及配菜，色香味俱全，唔怪得Cathy咁落力推介。
卓妮未聽過Cathy戒食牛肉，追問之下，原來一、兩年前大女晞彤唔小心整親，靚媽心急之下祈求上天保佑。佢聽人講戒食牛肉可令心願靈驗，所以就戒咗牛肉啦！
The French Window要到明年初先至正式開張，佢哋肥肥白白嘅主廚Mickael曾經跟過米芝蓮三星廚師學藝，相信食物質素唔會令人失望。除咗西餐外，Cathy都會去國金軒、龍景軒醫肚。佢最鍾意國金軒嘅「北京填鴨二吃」，片皮之後嘅第二吃「生菜包鴨鬆」，特別得佢歡心。卓妮轉頭問Martin平時去邊度開飯，估唔到兩公婆品味相同，又係推介呢三間；梗係啦，三間全部都係Martin打理嘅美麗華集團旗下食肆，兩公婆果然心有靈犀！
卓妮