立法會議員李慧琼（Starry）與黨友陳仲翔在本周日公布一項少女援交狀況調查，聲稱調查係與性工作者組織「紫藤」合作，但紫藤前晚發聲明譴責民建聯挪用及扭曲咗佢哋嘅資料，澄清雙方並無合作關係。Starry尋日朝在電台節目上，承認雙方工作上接觸不代表合作，並向紫藤道歉，但佢下午再開記者會交代事件時卻迴避道歉問題，辯稱只係雙方溝通有誤會。
據聞紫藤最擔心嘅，係事件令人誤解佢哋隨便洩露求助人資料，唔再搵佢哋幫手。對於未獲同意就公開披露資料，Starry堅稱只係雙方對「合作」一詞有唔同理解，基於雙方過去半年嘅「合作」，睇唔到紫藤提供嘅數據唔可以被引用，陳仲翔仲話在記者會上引用數據，係「Common Sense」（常識）喎。
事到如今，無論誰是誰非，Starry話絕對不能夠接受紫藤嘅嚴厲聲明。