不過話時話，家陣諗番轉頭，曾蔭權打死都唔肯出席氣候峰會，義無反顧做一個「氣候逃犯」，可能係因為佢有先見之明。或者煲呔曾一早就心諗，唓，開會都係多餘嘅啫，各國領袖全部各自為政，淨係識得叫人減排，自己毫無環保承擔，結果梗係一事無成㗎啦，千里迢迢出席會議簡直浪費時間。果不其然，又真係畀佢估中喎，事實的確如此，氣候峰會左搞右搞你吵我鬧，終於得出一份寥寥三頁紙又全無約束力嘅所謂「哥本哈根協議」，內容空泛到好似小學生作文題目「我的志願」——我嘅志願就係呢，終有一日變身超人打怪獸救地球！

既然曾蔭權唔肯去哥本哈根，順理成章當然係環境局局長邱騰華捱義氣，走咗去做氣候逃犯代言人。之但係，邱局長除咗來來回回搭長途飛機製造廢氣之外，對寶貴嘅地球有乜嘢貢獻呢？邱騰華出發前已經好縮骨咁話，香港作為中國一部分，係唔會自定減排目標嘅，如果中國定咗目標，香港就會盡量配合。呢鋪真係求仁得仁，求懶得懶，既然成個氣候峰會爛尾收場，世界各國全無目標一致嘅減排共識，邱局長大條道理搖頭晃腦咁講：唉，唔係惟弟細佬我唔想救地球呀，之不過成班位高權重嘅大佬都冇行動咯，香港點做都係杯水車薪嘅啫。

由於氣候峰會失敗到冇朋友，氣候逃犯代言人又死蛇爛鱔，遲遲未有交代有關香港氣候變化嘅顧問研究報告，環保團體綠色和平尋日走咗去中環和平紀念碑公園，豎立一百個十字架，敲響三十下鐘聲，哀悼受害於氣候變化嘅死難者。

死難者到底係邊個？今日係完美風暴嘅災民，明日係超級豪雨嘅難民，至於明日之後咯喎，包括你我他她牠嘅六十億人口暨所有動物！

氣候峰會裏面，小國譴責大國，批評富裕國家丟低三十個銀幣就要猶大出賣耶穌，即係出賣弱小國家嘅未來。計功夫茶話齋，邱局長可能已經決定做猶大，將香港嘅未來大賣特賣。

唉，諗諗下，綠色和平豎立一百個十字架應該遠遠未夠數。你知啦，今日空談環保，明日全民着草，成個香港都陸沉咯，想唔做氣候難民都唔得。既然特區高官唔肯推行環保，等於一手炮製大量枉死冤魂，功夫茶建議，中環和平紀念碑公園應該豎立七百萬個十字架！