無乜新意嘅政改諮詢正進行得如火如荼，本身揸大旗推政改嘅政制及內地事務局局長林瑞麟（林D9）好自然做咗眾矢之的。尋日我哋喺一個籌款活動見到林D9嘅三哥林兆麟（Simon），佢就話唔覺林D9喺推政改方面有壓力，因為從來都冇聽佢提起過喎！不過Simon就為號稱「人肉錄音機」嘅細佬辯護，話林D9私底下其實好幽默，喺家庭聚會度成日都會講笑話氹人開心，絕對唔係平時打官腔咁沉悶喎！
本身係會計師嘅Simon話，林D9係家族中最細嘅細佬，細細個成日畀一班阿哥蝦，不過六兄弟姐妹嘅感情其實相當好，每逢大時大節幾個家庭都一定會聚埋一齊食飯。
不過初初佢聽到林D9畀人叫做公公，又話佢成日噏廢話嘅時候，心裏面都有啲唔舒服，但事後知道林D9一啲都無將呢啲小事上心，慢慢就習慣咗，依家都已經唔介意。