劉慧卿可能係第一個講明唔會為請辭後補選站台嘅民主黨立法會議員，佢尋日話力撐二○一二雙普選，但係請辭補選變相公投嘅議題係「落實真普選，取消功能組別」，即是無提及二○一二，佢話咁樣較難接受，如果佢支持喺呢支旗下面嘅候選人，擔心畀人誤會劉慧卿唔再支持二○一二雙普選。
尋日卿姐同傳媒講，民主黨會喺表決政改方案前召開特別黨員大會，由黨員決定黨嘅投票立場，佢個人嚟講，除非二○一七同二○二○嘅普選時間表有鐵一般保證，否則二○一二無雙普選就無得傾。卿姐唔為請辭後補選嘅候選人站台，即同兩黨不和浮面喇。
講番星期五佢主持嘅財務委員會會議，由於兩黨拉布，高鐵撥款最終未能表決，唔少人話劉慧卿畀兩黨夾佢，佢尋日就話唔覺，反而包括政府等都話佢主持得好公道。至於高鐵撥款係唔係喺一月八日嘅財委會再傾，佢身為主席都話唔清楚，因為財委會議程係政府定嘅。