家有賢妻做一家之「煮」嘅立法會議員象哥黃定光同李華明當然唔使為呢餐做冬飯頭痕，不過講到要食咩餸，佢哋兩個都異口同聲落柯打話唔可以無雞。自封係「肉皇大帝」嘅象哥自細就好鍾意食雞，不過佢就好識食，淨係食脂肪低嘅雞胸，但係佢就認為自己蠢到加零一，因為雞胸肉唔夠滑。

至於年頭大呻阿媽攞三百蚊買隻鮮雞嘅肥仔明，唔知係咪肉痛到依家，所以今年做冬佢都寧願疊埋心水食冰鮮雞，佢仲話自己鍾意食豉油雞，所以平平地三、四十蚊買隻冰鮮雞嚟做豉油雞都無問題，總之鍾意豉油味，都唔理啲雞夠唔夠雞味。

不過講到食雞皮，象哥同肥仔明兩個雖然唔同政黨，不過都好齊心咁一齊反雞皮。象哥話佢後生嗰陣都愛雞皮，依家？咪制嘞。