上次甩底飯局經我哋踢爆之後，據聞最無癮嘅唔係煲呔曾同一眾畀佢放飛機嘅賓客，而係其他冇獲邀出席嘅城中名人，質疑煲呔曾連慶祝結婚周年紀念都要玩親疏有別，唔當佢哋係「曾朋友」。所以飯局搞手「煲呔針」鄭經翰同其他賓客，事後都一致否認該餐飯係為咗煲呔曾夫婦而搞，聲稱只係一場大食會，為煲呔曾臨時甩底同請漏人遮醜。

煲呔曾喺該次飯局後，又捲入雷曼迷債益弟婦風波，民望再度插水跌至「不受歡迎」水平，不過咁都冇打消到佢慶祝結婚周年嘅興致，喺事隔短短三個禮拜後再喺禮賓府打正旗號大排筵席、補鑊慶祝。地點改喺唔會有外人撞破嘅禮賓府舉行，唔再好似上次咁，喺跑馬地馬主廂房嘅大玻璃窗前咁「透明」。

愈搞愈大 請過百嘉賓

據獲邀出席嘅賓客透露，煲呔曾當晚喺禮賓府一共筵開九席，比上次原定嘅七席仲多兩席，最終有超過一百名嘉賓到場。其中坐主家席嘅清一色係煲呔曾夫婦嘅親人，不過就唔知有冇請到佢代理慳電膽嘅親家同買咗雷曼迷債嘅弟婦。其他嘉賓包括長實集團主席李嘉誠同佢大仔李澤鉅、政務司司長唐英年、教育局局長孫明揚、利豐主席馮國經、嘉華主席呂志和、立法會議員劉皇發同梁劉柔芬等。

上次飯局有唔少賓客帶同一袋二袋嘅私伙靚酒到場。今次煲呔曾就開宗明義叫大家唔好做禮，以免自己再爆多單利益輸送醜聞。不過其實佢喺當日朝早已經公開收咗一份大禮，就係民調專家鍾庭耀撰寫嘅《香港家書》，揶揄煲呔曾咁不受市民歡迎，喺英美民主國家一早就倒咗台，難為佢仲有心情大吃大喝慶祝！