本文重點
唔好睇喺北角渣華道市政大廈入面嘅東寶小館只不過係大牌檔，嚟幫襯嘅唔止街坊，仲有為咗食味道而唔係食排場嘅老饕。立法會議員陳淑莊（Tanya）係呢度嘅熟客，貪佢用料夠新鮮，老闆又鍾意播Rock歌，佢試過拉埋黨友余若薇同梁家傑一齊去，兩個人都話喺呢種大牌檔食飯感覺唔錯。
東寶好多菜式都好出名，包括黃金蝦、大肚婆炒飯同啤梨彩椒炒斑球，Tanya最鍾意就係風沙雞同南乳炸豬手，仲稱之為東寶必食之選。佢大讚風沙雞皮脆肉滑，豬手爽口唔肥膩，加上老闆送嘅糖水薑汁涼粉又足料，幾時食都咁開心。唔怪得Tanya話試過一年食足成一百次啦！
雪凍隻碗裝啤酒夠fresh
除咗食物，Tanya仲話好欣賞東寶先雪凍隻碗，再用嚟裝啤酒畀客人飲嘅做法，話覺得咁飲至夠fresh喎。不過東寶經常人頭湧湧，有時訂咗位都仲要等，唔知話由陳淑莊介紹，會唔會快啲有位呢？
卓妮