中總早幾日舉行會員聖誕聯歡晚會，盧文端以港島東區聯絡處主任身份捧場，卓妮見佢同人握手時，左腕隱隱透出一度玫瑰金光，睇真啲，原來係名錶Patek Philippe Calatrava系列 18K玫瑰金腕錶，盧生自嘲係懶人，最怕上鏈錶，呢隻錶具備機械機芯自動上鏈，啱晒心水。隻錶售價達十八萬幾，呢份禮物含金量十足，睇怕盧生要買番粒五卡鑽石回禮畀太太至得。

幫襯純官買錶等升值

盧文端自己亦愛收藏名錶，佢話最近幫襯新世界集團第二代接班人「純官」鄭家純，喺周大福買咗兩隻國產海鷗牌雙陀飛輪手錶，每隻打咗折頭後盛惠廿幾萬銀，不過佢就話好抵買，外國製造實買唔到。何解鍾情國貨？盧文端話，多年前已購入一隻同牌子手錶，但設計係單陀飛輪，如今中國已製造出雙陀飛輪手錶，趁早買番隻錶等升值實冇錯！

卓妮