潮流興環保，收買佬好有巿場，像全國政協委員黃英豪，律師兼做收買佬，做得頭頭是道，誠如他所說︰「爛銅爛鐵都值個錢！」何況他收買嘅是比銅鐵更值錢嘅黃金，結果「金」生水起，在偶然嘅機遇裏，無心插柳的他卻把握了機會，接收咗金至尊嘅零售業務，成了「新金王」。黃英豪決心省靚金至尊，帶領金至尊走入國際，誓要做個成功收買佬！
「收買佬」點石成金
去年七月，黃英豪牽頭與由澳洲返港發展嘅老友尹應能以及尹嘅老友徐子淇父親徐傳順，收買了當時面臨清盤嘅海域化工，再把它循環再造變成香港資源。原以為福無重至，偏偏收買佬有運行，海域化工復牌不久，金至尊又爆煲出事，海域化工做金鹽，中下游可以做貴金屬、金條及黃金零售，加埋金至尊，正好提供一條龍服務，做得過，加上當時他們同清盤人買貨，用五二折低價就買到筍貨，這個地樁打得好，萬尺高樓也就容易起，所以佢拍板買埋金至尊，今次由徐傳順做金至尊副董事長，最後更造就徐傳順嘅親家、四叔李兆基入股香港資源，徐子淇老公李家誠就入股持有金至尊嘅中國金銀集團。
滿腹大計等接棒？
接手才不過年多，黃英豪話，當日嘅投資早回本，今日賺嘅都係實利，不過「新金王」做事一向實事求是，佢話嚟緊嘅工作，就係要省靚金至尊嘅品牌。現時金至尊在內地店舖數目佔有率僅次於周大福同六福，數目有一百一十三間，加盟店有一百一十間，港澳區就有十三間，嚟緊會進一步擴張，包括在港開設四間金至尊嘅副線銀河明星新店，還計劃到日本開店打響知名度，又與國家四大銀行之一嘅農業銀行達成協議，破天荒喺農行賣金至尊金條，更落實與做咗媽咪不久嘅Kelly陳慧琳續約，並正游說Kelly與囝囝母子登場推出新產品……滿肚的點子正在「新金王」嘅小宇宙裏運行不息。
男人四十而立，今年四十六歲的黃英豪有齊事業和家庭，問佢有沒有中年危機？「新金王」笑了笑說︰「你覺得呢？」佢話現在開山闢石辛苦頭幾年，做順了就會有人幫你行落去，現在律師行有很好嘅合夥人，公司有很好嘅員工，過兩年他還可以抽身出來做其他工作，譬如說為慈善為人服務。中總立法會議員黃宜弘兩年幾後卸任，唔知「新金王」有冇興趣接棒呢？
卓妮