地政總署早前為旺角區一個五百多呎的私樓單位招標，但有意競投的陳先生從大廈管理員口中得悉，單位多年前曾發現腐屍，再三向地政署求證不果，「問又唔答，網頁又冇資料！如果盲舂舂買咗點算？」另一競投者李小姐亦稱，向鄰居打探後亦得悉警方曾破門入屋搬走屍體，不滿當局為求出售單位刻意隱瞞。

女業主疑失救而死

記者在單位開放日發現參觀者眾，期間有市民向地政署職員查詢單位是否曾發現屍體，只見職員諸般迴避，僅囑市民「自己考慮」。毗鄰單位一名男戶主在記者查詢下透露，單位原由前女業主獨居，「大概十年前，因為好多日都冇見過佢（前女業主）出門口，大門又反鎖咗，我驚有事咪報警囉，原來佢（女業主）已經死咗好多日，差人話懷疑佢有病失救喎！」事後發現女戶主拖欠大筆管理費及地稅，最後由政府接收單位。

對於被指隱瞞凶宅一事，地政署發言人拒絕回應，只稱單位前業主積欠地稅，政府於○六年刊憲後，已將單位轉歸財政司司長法團，並由該署於○七年接管，自撥歸政府後並無發生不愉快事件紀錄。

警方發言人回應本報查詢時，則以「事件不屬警務處工作範圍」為由，拒絕提供資料。

李小姐坦言不滿部門答覆，認為有互相包庇之嫌，「市民想查單位有冇問題都唔得，分明就係整個氹畀市民踩！」

立法會房屋事務委員會主席王國興指出，房署與地產業界對出售凶宅早有共識，直指當局做法難以服眾，認為倘有買家以當局隱瞞實情作踢契藉口，庫房將無端蒙受損失，促當局從速檢討。

可能造成踢契索償

「地政署同警方唔肯公開資料，明顯係耍官腔同扯貓尾，唔少人一世人只會買一次樓，部門冇理由咁做！」立法會房屋事務委員會委員黃國健亦認為，地政署應以房署及地產業界做法作參考，釋除市民疑慮。

法律界人士梁永鏗表示，倘不愉快事件影響物業價錢，政府有責任公布，否則有可能造成踢契及追討，「不過如果標書有寫清楚，講明政府有啲嘢唔孭飛，市民就要睇清楚！」

轉手困難 買家小心

市民一旦購入「凶宅」，無論售價與轉手俱困難重重。中原集團（企業風險管理）董事郭家豪指出，現時本港的凶宅無官方資料，僅有互聯網及銀行會按新聞報道搜集資料，「一般跳樓、燒炭都好影響（單位）個價，自然嘅生老病死影響就細啲！」郭指一般買家可委託銀行初步估價或向管理處了解，甚至可要求業主聲明單位從未發生意外或死亡事件，以作保障。

地產代理聯會主席郭德亮亦稱，現行法例並未規定地產經紀須向買家透露凶宅資料，惟買家如有查詢，代理則須盡力代查，「因為涉及私隱，要立例就難啲，如果搞到個價錢跌咗，都唔知搵邊個負責！」

記者 吳琰玲