信興集團主席蒙民偉向來愛熱鬧，加上中氣十足，周不時唔係見佢約老友食飯，就係出席Event湊熱鬧，不過最近幾個月少見咗蒙叔喺公開場合出現，連早前「蒙仔」蒙德揚（David）喺港大扑頭攞名譽大學院士銜咁威水嘅事，都唔見蒙叔嚟賀個仔，上個月佢哋公司喺沙田搞一年一度嘅樂聲盃，蒙叔都一樣甩底缺席，難怪當時傳聞話蒙叔身體唔係咁舒服，要入醫院休養抖抖。
不過大家唔使擔心，尋日「蒙仔」喺馬場出現，不忘代爸爸向大家報平安，David話爸爸之前只係有少少感冒，不過因為將中西藥撈埋一齊食，結果就搞到嚴重咗，但係依家無事啦，身體ＯＫ晒啦，咩事都無，仲識得鬧人添。咁又係，呢幾個月啲天氣時凍時熱，後生仔都中招啦，更何況年過八十嘅蒙叔呢。蒙仔話嚟緊聖誕節佢哋全家都唔會外遊，所有兄弟姊妹仲會由世界各地返嚟陪蒙叔玩。