黃大仙彩虹邨邨齡逾四十年，屬本港老牌屋邨之一。儘管邨內、外設施均殘舊不堪，樓宇石屎剝落嚴重，結構安全成疑，房屋署於○六年仍決定繼續將屋邨保存十五年。近日該邨單位陸續翻新，工程期間有單位即時出現滲水及塌石屎，居民要求調遷卻未獲正視，每日為擔心「中頭獎」而惶惶不可終日。
郭婆婆獨居於彩虹邨碧海樓已逾三十年，近年單位天花開始出現石屎剝落，年前更險些「中頭獎」，「個天花補完呢邊就甩第二度，仲有廚房啲渠又漏水，搞到廚櫃邊啲石屎霉晒，一開櫃門就有嘢飛出嚟！」
「漏到好似開水喉」
直至數月前，上層單位進行翻新工程後，婆婆的單位即出現更多問題，「上面日日係咁鋤，整到啲石屎鬆晒，啲渠係咁漏，漏到好似開水喉咁，直情要搵個盆載住，問房署話調遷又冇回音。」記者到訪當日，婆婆只輕輕觸碰天花，隨即便有石屎塊鬆脫墮下，部分位置更露出鋼筋。
居於郭婆婆對下一層單位的陳女士亦發現，自樓上翻新工程開展後，單位大廳及廚房的天花隨即「起泡」，「翻新嗰度流啲水落阿婆間屋，然後再滲到我呢度。啲灰成日係咁跌，抹都抹到冇停手。如果阿婆個單位大修，我呢度又會同佢一樣咁爛法。」
房署發言人指出，上述單位石屎剝落純屬自然老化現象，與上層翻新工程無關。至於滲漏問題，發言人指郭之單位因廚房天花排水管輕微破裂，而陳之單位則因上層單位地台滲漏所致，前者已有七次要求小型維修的紀錄。不過，發言人拒絕透露過去三年該邨住戶反映滲漏及塌石屎之數字，只稱彩虹邨樓宇結構安全，經維修及改善工程後將可提升樓宇狀況。
「間屋成日有石屎剝落，就算唔係結構問題，住喺度都有危險！」當區區議員莫健榮認為，當局的維修及調遷標準尚有改善空間，倘單位石屎剝落、滲水情況嚴重，或屢經維修仍未能解決問題，當局理應按住戶意願，彈性安排調遷。
驗樓師疑勘察不準
驗樓師詹濟南指出，樓齡逾八年半的大廈出現穿透式裂紋並不為奇，倘修補不當，滲水問題便難以根治，「啲水經呢啲裂紋，唔單止可以流落一兩個單位，仲可以流去好多個單位都得。房署如果依足規格修補，應該唔會有補完又漏嘅情況，補過同補好係兩回事！」詹又稱，石屎會因老化而剝落，倘出現「補完呢度到第二度甩」，則或與勘察位置不準確有關。
記者 莫麗珊